Matthew 5

Ísu omápaꞋa ména simátímakain-kwasai.

Árúku 6:20-23

1Ísu máyowasa sáwíva-kwaasimo tóyo umbá tuwánéna omápaꞋa umáyowasa kwená kwaásiyomba torupamái máyówana 2simátimena séna 3Áánútu súwaꞋnaa ínkwáe sewáí Áánútu miwí kaweꞋá kwéumatinkena miwíráꞋá kwégawaaiye. 4miwívímbá sáwí-imayaa kwáyáísana tirunkó umbaí kwétaiwai Áánútu miwí kaweꞋá kwéumatinkena etóyóí kwéumatinkaiye. 5kesáváí túmo ímo maé kwéiyowai Áánútu miwí kaweꞋá kwéumatinkaimba pósa siráim-barama mayánááowe. 6Áánútu siráintemba mirá ónáe kwésewai Áánútu miwí kaweꞋá kwéumatinkena kaweꞋó umáímo ménaaontavena kaweríꞋa umátinkaniye. 7tirumbó kwéumatinkaawai Áánútu miwí kaweꞋá kwéumatinkena arumbá umátinkaniye. 8tirumpinkémbó kawer-áíné suꞋmai kwésewai Áánútu miwí kaweꞋá kwéumatinkaimba pósa Áánútumba awánanaaowe. 9kwaásivimbo paru umátinkanaaontavesa mayáí kwémayaawai Áánútu miwí kaweꞋá kwéumatinkena kesí iyámpóin-owe síníye. 10Áánútuntavesamo imáyáamo ésamo arupí umáímo máyáantavesa sáwíꞋa kwéumatinkaawe. Áánútu miwí kaweꞋá kwéumatinkena miwí kwená kwaási-iꞋo ombá póna kwégawaaiye. 11keinárawaꞋo kentávéꞋo asiramáímo máyáantavesa mindáyavesa sáwí-aimba simátinkesa sáwíꞋa umátinkesa óꞋon-oꞋon-kampar-aimba simátinkaamba Áánútu keinárawaꞋa kaweꞋá kwéumatinkaiye. 12naaóváꞋó Áánútun-aaimo simátímakowaimo sáwíꞋo umátínkaraantemba ívéꞋa sáwíꞋa kwéumatinkaamba tirunkó kaweꞋá kwéinaꞋa aamoí éꞋa kwíyómpakemba kentí kaweꞋ-méyámbá mayánááowe Ísu siráiye.

sán-kaí-áíné uwígón-aaiye Ísu siráin-kwasai.

Mááka 9:50, Árúku 14:34-45

13Ísu simásuwena simátimena séna marapáꞋó máyáan-kwaasivimba méꞋa uwígómó áséimo intenkáámbá kwéowe. mirá kwéombanivo uwímó sáwíꞋo énamo imbá íma kaweꞋá umái kéna íma áséi éna úwoisankaamba umágwisasa aampaꞋá tukésa kwénaaowe.

14marapáꞋó máyáan-kwaasivimba méꞋa sámo kaintenkáámbá kwéowe. ááraipaꞋo kwáyáin-daopaꞋo mósá awánaantemba keinárawaꞋa máyáawaina ááimba kwéawanaawe. 15iramá oómbá kúraꞋmaresa íma aúpáꞋá maráíyamba avoraꞋá maráíyamba mindáópaken-kwaasi awánanaaowe. 16miráumai sámo kaintembá kwaásivimba méꞋa sán-kamátinkaiyasa kentí kaweꞋ-máyáí tuwánésa kentivo kwíyómpaꞋo máyáiwai áwíꞋa mósá maránááowe Ísu siráiye.

Ísu ámáámba siráin-kwasai.

17Ísu mináímbá simásuwena séna íma kentávéꞋa séꞋa Mósesi siráin-aine Áánútun-aai simátímakaawai siráan-aine iváꞋá túwáiwaiye íma seró. Áánútun-aai siráan-aimba íma tuwánaumpo siráanteniꞋo umáímo paárinintaveꞋa kunkáumne. 18simátíménda ísáaro. kwíyómba maramá kwáyáísana póna Áánútun-aai kwaíkwaiꞋa kwéiye. Áánútun-aaigo amápaꞋa kwaíkwaiꞋa kwéimba póna mináínkómó siráinten-umai amápa-tantaaꞋa paáriniye. 19miráumai Áánútun-aaivinkembo kítor-aimbo araaisésamo óꞋowantavesamo sésamo kwéundantemba mirá ínímba mindá kanaán-iye síyanamo éna Áánútu séna kesí kwaási kawááunda-kwaasivinkemba íma asirayán-kwáásímán-owe sínívo Áánútun-aaimo taagwiyavésamo simátimesamo sésamo Áánútun-aai ísáaro kwésewaiyavena Áánútu séna kesí kwaási kawááunda-kwaasivinkemba anón-kwaasiman-owe síníye. 20moórá-aimba simátimunda ísáaro. ámáán-kawaa-kwaasiye ámáámba sen-kwáásíyé sésa Áánútumo siráintemba umái máyaumnemo sembá kampaꞋá kwésewe. miwímó ontembó keinárawaꞋo éꞋa Áánútumo kawááipaꞋa íma méꞋa Áánútumo siráintemba áraiꞋa mirámó éꞋo éꞋa Áánútumo kawááipaꞋa ménaaowe Ísu siráiye.

tínkamon-aimba siráin-kwasai.

Árúku 12:57-59

21Ísu maarán-áínkwáráꞋá séna naaóváꞋá Mósesi kentíkwáꞋnáyavena simátímakain-aimba ísaraamba maará séna tínkamiyasamo puwónááoniꞋa íma oró. mirámó íyasamo ésa aaivimbá maitinkánááowe siráimbanivo 22simátimeꞋa séꞋa miwítí kwaásiyavesa aaisambá kwétiyiyawai aaivimbá maitinkánááomba mindá kanaán-iye. miwítí kwaásiyavesa sáwí-aimba simátínkáawaima tíꞋmaesa aaimó ísáawaitopaꞋa mátinkaiyasa aaivimbá maitinkánááomba mindá kanaán-iye. miwítí kwaásiyavesa uwoꞋaó-kwáásíyáꞋo. úwoi-kwaasiyaꞋo. sésa simái sáwíꞋa kwéiyawai sáwí-meyambo mayánááopaꞋo iramó kwégaipaꞋa ménaaomba mindá kanaán-iye. 23mirán-áímbá imáyáa ombá ÁánútuntaveꞋo imáyáamo éꞋo moórá-yantaaꞋo aménáeꞋo anóm-bonoꞋ-naumpaꞋo koméꞋo éꞋa kentí kwaási aaí tátokaiyaꞋo táákaꞋo makéꞋo éꞋa 24Áánútumbo aménááon-tantaaꞋa óntan-taareigona egwaaꞋá mámareꞋa mináímbá koísámai arupí umásuweꞋa koyauweréꞋa Áánútumba áméro. 25aaimó simátinkanae síyawaimo tíꞋmae kwíyasa aampaꞋá mósimai paárumasuwesa koró. anón-kwaasimo mátimiyasamo ésa i-kwáásí timíyasa ándá-naumpaꞋa tinkánááowe. 26ímo mirámó íyasamo ésa ándá-naumpaꞋa mótinkaiyasa íma ááéma ánásanaumne sésa amápaꞋ-meyamba tímatuwaiyasa ayútinkanaaowe Ísu siráiye.

aarakwáꞋó tasáén-aimbo siráin-kwasai.

Mátíyu 19:9, Mááka 10:11-12, Árúku 16:18

27Ísu mináímbá simásuwena séna naaóváꞋá Mósesi simátímakain-aimba ísaraamba maará séna óꞋowi tuwainímbááre tuwaiꞋmááte íma nááóro siráimbanivo 28simátimeꞋa séꞋa moóráwaimo moórá-inimbo awánénamo tavisénáe sénamo ínímba íma avoraꞋá ínívo imáyáaneiye suꞋmai tavisínana Áánútu séna imáyáavinkemba áꞋa kwéyavisiye síníye. 29túrankomo sáwíꞋo ínaꞋa misáwí-ámpáꞋá kúnavo séꞋa moórá-turamba pítuwaaro. kae-túrándéímó awánéꞋo éꞋa sáwí-marupaꞋo iramó kwégaipaꞋa kónááomba mindá sáwíꞋan-iye. sáwíꞋo uráinda maisuwéꞋo máyáamba mindá kaweꞋán-iye. 30tiyáánkomo sáwíꞋo ínaꞋa misáwí-ámpáꞋá kúnavo séꞋa moórá-tiyaamba arátúwáaro. kae-tíyáámbó kwáyainaꞋo éꞋa sáwí-marupaꞋo iramó kwégaipaꞋa kónááomba mindá sáwíꞋan-iye. sáwíꞋo uráinda maisuwéꞋo máyáamba mindá kaweꞋán-iye.

31naaóváꞋá Mósesi maará séna moóráwai awainínkómbá aiꞋmátuwaindawai aúváívimba agaimaréna séna kesuwainímbá aiꞋmátuwaumne séna agaimái amiíno siráimbanivo 32simátimeꞋa séꞋa awainínkó íma moórá-kwaasigoe kwénaaisana awaikó aiꞋmátuwaisana minínínkó kówéna moórá-kwaasi komairéna minínínkó aúná-kwaasigoe kwénaaimba sáwí-amba kwénaaiye. aivar-áwáíkómó aiꞋmátukaintavena mirá kwéiye. moórá-kwaasigo aiꞋmátukain-inimbo kwémayaimba kwegwáráꞋá umóyámbá kwémayaiye Ísu siráiye.

amápa-tantaapimba íma matuwéꞋa seró-kwasai.

33Ísu maarán-áínkwáráꞋá séna naaóváꞋá Mósesi simátímakain-aimba ísaraamba maará séna Ísóigompata mirá ónaumne síyamba kampaꞋá seváínivo áraiꞋa séꞋa mirá oró siráimbanivo 34simátimeꞋa séꞋa kemó mirá ónaumnemo síyambo éꞋa áraiꞋa mirá oró. kemó ímo mirá ónaumnemo síyambo éꞋa áraiꞋa íma mirá oró. Áánútu kárákwiraiwai kwíyómpaꞋa máyáivo Áánútu áwíkaꞋa íma matuwéꞋa seró. 35Áánútu marapáꞋá kárákwiraipaꞋan-ivo íma mararáꞋá matuwéꞋa seró. Yérúsaremu-naopaꞋa Áánútu kárákwirain-daópaꞋan-ivo íma mindáópaꞋa matuwéꞋa seró. 36avután-áꞋnóntáúráꞋá kaantáún-aꞋnontau íma kanaán-umai auréꞋa kaantáún-aꞋnontauraꞋa avután-áꞋnóntáú íma kanaán-umai auránááovo tiꞋnónkáꞋá íma matuwéꞋa seró. 37kemó mirá ónaumnemo síyambo éꞋa maarán-áíné suꞋmai seró. owé mirá ónaumne seró. kemó ímo mirá ónaumnemo síyambo éꞋa maarán-áíné suꞋmai seró. aꞋáo íma mirá ónaumne seró. simátimunda-aimba Sáátáánigona imáyáavinkeniꞋa kwéowe Ísu siráiye.

anondámo ímo tínkami-kwasai.

Árúku 6:29-30

38Ísu mináímbá simásuwena séna Mósesi simátímakain-aimba ísaraamba maará séna moóráwaimo moóráwai aúrambo pítuwainasamo ésa kwená meéyámbá kwenaúramba pítuwanaaowe. moóráwaimo moóráwai áwááyaamba kútúyuwainasamo ésa kwená meéyámbá kwenáwááyaamba kútúyuwanaaowe siráimbanivo 39simátimeꞋa séꞋa moóráwaimo sáwíꞋo umánkáimba íma anondá kwembá sáwíꞋa umánkaino. moóráwaimo ááꞋo tuwausínamo e íma kwembá inkamé ókwaraꞋa kwántáminana tuwausíníye. 40moóráwaimo ená unáánkwátóiyavesamo mayánaunda póꞋa áíꞋmaeꞋa aaimó isáí-kwáásígónópaꞋa máánkareꞋa ókwaraꞋa mayánaumnemo sínamo e íma aꞋáo se paákár-únánkwátóigwaraꞋa amiyó. 41moóráwaimo aampaꞋó tátorenamo séna kesí náaindaamba sáwíyankaꞋa súwaꞋnaa uwómó sínamo e íma aꞋáo se úwoi ayáátáákaꞋa áwaꞋnaa uwo. 42moóráwaimo moórá-yantaatavenamo simiyó sínamo e úwoi amiyó. moóráwaimo moórá-yantaatavaimo kwááyu simiyó sínamo e mirá uwo Ísu siráiye.

namuro-kwáásí kaweꞋá umátínkáaro-kwasai.

Árúku 6:27-28, 32-36

43Ísu mináímbá simásuwena séna naaóváꞋá simátímakain-aimba ísaraamba maará séna kentí kwaásiti imáyáa oro. kentí namuro-kwáásí tíyámba umátínkáaro siráimbanivo 44simátimeꞋa séꞋa kentí namuro-kwáásí imáyáa timéꞋa sáwíꞋo umátínkáawaiyaveꞋa túwaꞋnaa umai ÁánútumpaꞋa námúnaa seró. 45mirámó ombá kwíyómpaꞋo kentivo máyáiwaina iyámpói-iꞋa kwéowe. Áánútu miráumai kaweꞋá umátinkena aaí sisaná aaꞋá kaisaná kawe-kwáásíráré sáwí-kwaasirare aaꞋá kaisaná Áánútu aaí sisaná aaꞋá tisaná arupí-kwaasirare ímo arupímo umáímo máyáan-kwaasirare aaꞋá kwétiye. 46amáparawai kentí kwaásiti imáyáamo kwéowasamo ombá anondá miwítí imáyáa kwéowe. táákísimo máyáan-umoyan-kwaasi íma kawe-kwáásí ombánivo miwítí kwaásiti imáyáamo kwéowasamo ombá anondá miwítí imáyáa kwéowe. miráumaimo kentí kwaásiti imáyáawe suꞋmaimo kwéiyanamo éna Áánútu íma kaweꞋ-méyámbá timínívo kentí namuro-kwáásígwáráꞋá imáyáa tíméro. 47amáparawai kentí kwaási-iꞋa umái kaweꞋá kwéumatinkaawe. Áánútuna aambó ímo kwárááwaigwaraꞋa mirá kwéowe. mirámó onten-umái kentí kwaásiye suꞋmai ímanivo kentí namuro-kwáásígwáráꞋá kaweꞋá umátínkáaro. 48kentivo kwíyómpakewai kasenkuíꞋa umái máyáimba mindáyaveꞋa imáyáa éꞋa kasenkuíꞋa umái máéro Ísu siráiye.